Sölvi Tryggvason

Nýtt blogg

Sun, 04 Mar 2007 18:07:23 GMT

Örir tímar kalla á örar breytingar. Nýtt blogg í nýju umhverfi. http://blogg.visir.is/solvi

Kíkiði þangað......: )

Alla leið takk!

Sun, 25 Feb 2007 21:57:59 GMT

Nú er að verða gaman. Kosningaskjálftinn er kominn á fullt og stjórnmálamenn keppast um hver á stærsta og sterkasta pabbann. Minns er meira á móti klámi en þinns. Skynfæralausir eru einir um að hafa komist hjá því að sjá/heyra/lesa viðtöl við kappsama pólitíkusa sem hafa slegist um að fá að bölva klámráðstefnugestum í fjölmiðlum. Í dag náði kappið nýjum hæðum í formi tillagna að netlögreglu. Stjórnmálamenn sem sitja sveittir við að hugsa upp leiðir til að skáka þessu ættu ekki að örvænta. Komum fyrir örflögu í heilum Íslendinga sem banna klámfengnar hugsanir. Sá sem skellir þessu fram á borðið á pabba sem ekki verður sigraður í sjómann í bráð.

Sló hann í hægri fótinn?

Thu, 22 Feb 2007 18:00:34 GMT

John Arne Riise er einfættasti leikmaðurinn í ensku úrvalsdeildinni og líklega mætti stækka það mengi til muna. Maðurinn er hreinlega handónýtur með boltann á hægri, svo mjög að það verður á köflum pínlegt. Miðað við tilburðina hingað til mætti leiða að því líkum að það hafi verið svona 1 á móti krónum Hannesar Smára á að hann hitti markið úr færinu sem hann fékk gegn Barca í gær. Var þetta lóttóvinningur ársins, eða barði Bellamy hægri fótinn í lag??

Hola í höggi

Wed, 21 Feb 2007 23:41:52 GMT

Þetta var sætt! Liverpool kenndu Barca að fótbolti snýst um meira en knattrak. Þessi leikur vannst á viljastyrk og dugnaði. Katalóníukettlingarnir voru kæfðir af alvöru mönnum, sem létu það ekki á sig fá þó að þrjatíu sinnum hefði gríski fetaosturinn flautað undan misháu voli heimamanna. Ég held að þessum vælukjóum á norð-austur Spáni veitti ekkert af að fara að taka aðeins í golfkylfurnar á æfingum. Í kvöld mættu drengir karlmönnum!!

Hvar er baráttuandinn?

Wed, 21 Feb 2007 12:42:07 GMT

Ég má til með að segja frá erfiðleikum Íslands í dag við að finna viðmælanda úr röðum báráttumanna gegn klámi til að mæta Geira á Goldfinger í þættinum í gær. Ekki stóð á Ásgeiri að mæta vegna umræðunnar um klámráðstefnuna, en vel á annan tug yfirlýstra andstæðinga gegn ráðstefnunni og kynlífstengdum iðnaði almennt, ýmist neitaði að mæta, eða afboðaði komu sína eftir að hafa ráðfært sig við ,,ráðgjafa sína". Það er vel skiljanlegt að einhverjir hafi andúð á Geira á Goldfinger, en þess þá heldur að mæta honum og taka slaginn. Ég efast um að stjórnendur Alþjóðahúss myndu neita að mæta mönnum í sjónvarpssal sem þeir teldu að væru að níðast á útlendingum. Látum vera að Alþingismenn eða þeir sem gegna embættisstörfum hafi ekki viljað láta sjá sig, en allt öðru máli gegnir um talsmenn þrýstihópa eins og femínistafélagsins, sem hafa einmitt það hlutverk að hafa hátt og láta í sér heyra ef þeim finnst pottur brotinn. Í hugsjónastarfi ætti hugleysi að vera bannorð og í verkið þarf fólk sem er tilbúið að taka slaginn hvar og hvenær sem er.

Hvernig er þetta hægt?

Sun, 18 Feb 2007 20:35:31 GMT

Við erum í góðum málum í Eurovisjón. Þó ekki nema bara vegna þess að það þarf undur og stórmerki til að við verðum ekki með mesta töffarann á sviðinu í maí. Síðhærður, rauðhærður, á fimmtugsaldri og það er honum svo natural að vera í leðurbuxum að fólki myndi bregða ef hann sæist klæddur öðru. Ég veit að hvorki í dag, né á fimmtugsaldri, gæti ég fyrir mitt litla líf talað norsku í leðurbuxum án þess að vera hallærislegasti maður á jörðinni. Þannig líður væntanlega flestum. Hvernig fer Eiki að þessu??

Hálfgert flopp

Sun, 18 Feb 2007 20:12:10 GMT

Maður þarf að vera bæði heyrnarlaus og blindur til að vita ekki af X-Factor, enda sennilega heil deild að störfum við það eitt að auglýsa þáttinn. Samt hefur maður einhvern vegin á tilfinningunni að áhorfið muni ekki alveg verða í samræmi við það. Við Þorbjörg verðum seint flokkuð undir sófakartöflur og horfum frekar lítið á sjónvarp. Endrum og sinnum finnst okkur samt gott að hlamma okkur niður við imbann skella í eina Eldsmiðjulummu, rucola og rauðvín með. Þetta gerðist iðulega á föstudögum þegar Idolið var og hét, en verður væntanlega sjaldgæft í vetur. Sorry ef ég móðga einhvern, en conceptið er bara ekki að gera sig, auk þess sem það vantar einfaldlega quality í keppendahópinn. Að undanskildum örfáum er þetta einhverra hluta vegna eins og eitt stórt karókípartý. Það eitt og sér gæti samt alveg reddast ef dómarnir væru þá bara umbúðalausir og segðu keppendum eins og væri. Því miður virðast þeir hins vegar yfirleitt halda að þeir séu staddir á stóru Dale Carnegie námskeiði og hlutverkið sé að peppa og styrkja sjálfsímynd. Mættu horfa oftar á American Idol, þar sem Simon Cowell fer gjörsamlega á kostum og hikstar ekki við að láta keppendur vita af því ef þeir eiga að snúa sér að öðrum hugðarefnum í lífinu. Hér eftir verður rauðvínsflaskan opnuð á mánudögum.

Vandmeðfarið

Fri, 16 Feb 2007 00:44:58 GMT

Það liggur fyrir að margir eiga um sárt að binda eftir dvöl á meðferðarheimilum hins opinbera hér fyrr á árum. Að sama skapi hlýtur umfjöllun undanfarinna daga og vikna að vera erfið fyrir þá starfsmenn sem unnu af hugsjón í Breiðavík og upptökuheimilinu í Kópavogi á þessum árum. Þeir tugir fyrrverandi vistmanna heimilisins sem ég hef rætt við leggja allir áherslu á að þarna hafi unnið margt afskaplega gott fólk, sem hafi lagt allt sitt þrek í að hjálpa vistmönnum. Eins hafa starfsmenn sem þarna unnu haft samband og ítrekað þetta. Enginn hefur þó véfengt að þarna hafi átt sér stað alls kyns mannréttindabrot. Það er alls ekki ætlunin að setja alla undir sama hatt og meirihluti starfsmanna vann líklega ekkert til saka. Það er ekkert grín að meðhöndla unglinga frá brotnum heimilum og því hef ég kynnst af eigin raun í starfi á meðferðarheimilinu að Stuðlum. Þar vinnur frábært fólk og sama má segja um Hvítárbakka og fleiri staði, þar sem faglegt og óeigingjarnt starf á sér stað.

Það breytir því ekki að það er skylda fjölmiðla að segja frá skýrum mannréttindabrotum sem viðgengust árum saman með samþykki hins opinbera. Þess vegna er það í hæsta máta ömurlegt og ábyrgðarlaust að reyna að gera lítið úr viðtölum við vistmenn þessara staða. Slík umræða getur orðið þess valdandi að skelfilegir atburðir fái aldrei að koma upp á yfirborðið. Á bakvið þrjú viðtöl í Íslandi í dag eru fleiri tugir samtala við vistmenn, þar sem sömu hlutir koma fram og í raun verri í sumum tilvikum. Ég efast ekki eina mínútu um að hið sama gildi um umfjöllun Kastljóssins og DV. Þeir sem beittir voru ofbeldi og niðurlægingum á unglingaheimilinu í Kópavogi skipta tugum. Kverúlantar og kjaftaskar sem láta sér detta í hug að viðmælendur séu að slá sig til riddara með því að koma fram í málum sem þessum ættu að skammast sín og hugsa sinn gang.

Alvöru jaxlar

Wed, 14 Feb 2007 00:19:11 GMT

Á tölvuöld eru heimatökin hæg fyrir þá sem vilja læra undirstöðuatriði í naglaskap. Á heimasíðu Steve Gym, sem nú heitir kraftaheimar.net má finna óborganlegan boðskap og fleygar setningar á borð við þessar: ,,Í gamla daga var engin æfing almennileg hjá Herði nema að hann fengi blóðnasir!” ......,,Það er ekki stálið sem svíkur mann, heldur mannfólkið"....og fleira í þeim dúr. Heimildir herma að menn verði að gjöra svo vel að æfa á klósettinu í Steve Gym ef þeir ná ekki hundraðinu í bekk, enda ekkert lítið sem gengur þarna á, eins og Þessi saga hér sýnir kannski best.

Brenglaður veruleiki

Mon, 12 Feb 2007 21:12:27 GMT

Í nýjasta hefti Mannlífs er loksins endanleg staðfesting á því sem við öll vissum. Forsíðumyndir eru fótósjoppaðar til helvítis. Merkilegt klúður samt að birta sömu myndina aftur inni í blaðinu, svona rétt til að fólk geti séð blekkinguna svart á hvítu. Ef Mannlíf gerir þetta geta menn svo rétt ímyndað sér hvernig þessum málum er háttað í glanstímaritunum úti. Svo er þessu haldið að almúganum blessuðum, sem sveittur kaupir sér hrukkukrem og fegrunarmeðöl fyrir óheyrilegar upphæðir án þess að högg sjái á vatni.

Metró

Mon, 12 Feb 2007 00:38:16 GMT

Jón Axel hóf á bloggsíðu sinni umræðu um kynþokkafulla ritstjóra í sjónvarpi og slefandi konur við sjónvarpsskjáinn. Þórhallur í Kastljósinu og Denni í Íslandi í dag eru báðir alvöru metrómenn, en ég held samt að þeir hafi hitt ofjarl sinn. Simmi í Kastljósinu hefur gjörsamlega rústað allri metrósamkeppni í sjónvarpi með nýrri færslu um málið. Það þarf alvöru nagla til að leggja í að blogga á þennan máta um útlit annarra karlmanna. Í þessu samhengi er samt auðvitað rétt að hafa í huga að karlmennskuímyndin brenglast eilítið við það að fá kinnalit og jafnvel "dash" af augnskugga framan í sig á hverju kvöldi!

Gruggugt vatn

Sun, 11 Feb 2007 17:11:17 GMT

Alveg finnst mér það með tærustu ólíkindum að enn á ný eigi að gera stórmál úr ,,vafasamri" fortíð stjórnmálamanna í útlandinu. Colin Cameron, leiðtogi Íhaldsmanna í Bretlandi á semsagt að hafa fengið sér kannabissmók þegar hann var 15 ára gamall. 15 ára!! Breaking news - Cameron: ,,I regret some things I did in the past".

Common, hvers vegna í andskotanum (fyrirgefið orðbragðið) er verið að draga þetta upp og gera úr því stórmál? Ég veit ekki með ykkur, en ég væri eiginlega svona frekar mótfallinn því að landinu mínu stjórnaði maður sem væri svo flekklaus að hann hefði alltaf breytt rétt frá blautu barnsbeni. Mikið hlyti sá maður að vera óborganlega leiðinlegur! Sem betur fer hefur lítið farið fyrir umræðu um það hvort Geir Haarde eða Ingibjörg Sólrún hafi farið á fyrsta fylleríið sitt 14 ára eða 18, enda hefur það ekki nokkur einustu áhrif á hæfni þeirra í stjórnmálum. Til allrar hamingju hafa íslenskir fjölmiðlar og pólitískir andstæðingar verið lausir við fýsn í þessa tegund af umfjöllun. Megi það vera þannig áfram takk!

Hvað vitum við?

Thu, 08 Feb 2007 10:32:03 GMT

Merkilegt hvað við erum alltaf sannfærð um ágæti nútímans. Breiðavíkurmálið er ógeðslegt og fólk spyr sig auðvitað hvað hafi verið í gangi og hvernig í ósköpunum þetta hafi getað átt sér stað með svo kerfisbundnum hætti. Nú eru vonandi allar líkur á að svona lagað eigi sér ekki stað á Íslandi árið 2007, en hvað vitum við? Það eru ekki nema nokkrir áratugir síðan það þótti sjálfsagt að bora í hausinn á fólki með geðsjúkdóma, eða óla það niður í lengri tíma við ömurlegar aðstæður. Fólk hristir gjarnan hausinn þegar það hugsar til þessa aðbúnaðar, eins og slíkt sé útilokað um aldur og ævi héðan af. Margt hefur auðvitað batnað, upplýsingaflæðið er meira, börn sem fullorðnir eru meðvitaðri um mannréttindi sín og eftirlitið er víða betra og meira. En alltaf verða til ákveðnir hópar sem eru auðveldari skotmörk fyrir níðinga en aðrir, börn og unglingar sem hafa brotið brýr að baki sér, þroskaheftir og þeir sem minna mega sín. Ekki bara eru einstaklingar í þessum hópum ólíklegri til að kjafta frá, heldur er orðum þeirra síður trúað. Markviss níðingsskapur verður hvorki útilokaður árið 2007 né 2030. ,,Reyklaust Ísland árið 2000" var óraunhæft markmið og ,,sadistalaust Ísland árið 2010" er það líka. Það sem hins vegar breytist vonandi í áranna rás er að skjól níðinganna þrengist smátt og smátt með aukinni upplýsingu og eftirliti með stofnunum.

Eiki er maðurinn

Tue, 06 Feb 2007 11:15:54 GMT

Úr því sem komið er eigum við einn sæmilegan kost þegar kemur að Eurovision. Eiki Hauks. Hefði ekki getað orðað þetta betur en Davíð Þór í bakþönkum Fréttablaðsins um helgina. Eiki er alltaf svalur, sama hvað á dynur og honum tekst einhvern vegin að gera hluti flotta sem aðrir ættu ekki glætu í. Hver getur verið svalur á þessum aldri, með sítt rautt hár í þröngum leðurbuxum, syngjandi ekki betra lag? Eiki mun ekki vinna keppnina, en hann er ,,our best bet". Rauða töffarann til Finnlands takk!!

Vígi fallið

Sun, 04 Feb 2007 22:15:52 GMT

Ég hrökk í kút í vikunni þegar komið var að fréttum útvarps. Eitthvað skrýtið teknóhljóð strax á undan fréttatímanum. Mistök? Nei sama hljóðið kom þegar ég hlustaði daginn eftir og svo kom skýringin. Hinu stáltrausta áratugagamla stefi hafði verið skipt út, því að fréttastofan vill sína að hún sé áræðin í takt við nýja tíma og tilbúin til breytinga ef því er að skipta. Og hvað kom í staðinn? Ekki beinlínis gæsahúðartónverk, heldur eitthvert hálfbælt teknóhljóð! Nú vil ég síður en svo hljóma eins og nöldurkerling eða leiðindaskarfur, en þetta var bara einfaldlega arfavitlaus ákvörðun! Jafnvel verri en þegar ákveðið var að henda hugtakinu ,,fréttir Stöðvar 2" og taka upp NFS.

Sumir hlutir eru svo traustir og niðurnegldir að þeim á bara alls ekki að breyta. Eitt af þessu var stefið á undan útvarpsfréttum. Svona næstum því sameiningartákn fyrir þjóðarsálina. Á að hætta að bjóða gleðileg jól klukkan sex næsta aðfangadag?